സമയം രാവിലെ പതിനൊന്ന് മണി, ഓട്ടപ്പടവ് മഹല്ലിലെ വരിസംഖ്യ സ്വരൂപിക്കുന്ന, അലവി ഉസ്താദ് എന്നെ സമീപിച്ചു കൊണ്ട് പറഞ്ഞു.
"നിങ്ങൾ ഏതാനും മാസത്തെ വരിസംഖ്യ തരാനുണ്ടെന്ന്".
ഞാൻ മഹല്ല് കമ്മറ്റിക്ക് കൊടുക്കുന്ന വരിസംഖ്യക്ക് പകരമായി കമ്മിറ്റി എനിക്ക് തരുന്ന രശീതിയിൽ സീൽ പതിക്കുന്നില്ലെന്ന പരാതി ഞാനുന്നയിച്ചിരുന്നു.സീൽ പതിച്ചു തരാൻ ആദ്യമവർ വിസമ്മതിച്ചിരുന്നെങ്കിലും , പിന്നീട് സീൽ പതിച്ചു തരാമെന്നവർ സമ്മതിക്കുകയും ചെയ്തപ്പോൾ,
രണ്ട് ദിവസം കൊണ്ട് കുടിശ്ശിക തന്ന് തീർക്കാമെന്ന് ഞാൻ സമ്മതിക്കുകയും ചെയ്തു.
തുടർന്ന് അലവി ഉസ്താദിനോട് ഞാൻ പറഞ്ഞു.
"അലവി ഉസ്താദേ,
എനിക്കിപ്പോൾ ജോലിയില്ല". മാസത്തിൽ ഇരുന്നൂറ് രൂപ വരിസംഖ്യയും, രണ്ട് മാസത്തിലൊരിക്കൽ ഉസ്താദ് മാരുടെ ഭക്ഷണത്തിന്റ പണം അഞ്ഞൂറ് രൂപയും തരണ്ടെ? ശരാശരി മാസത്തിൽ നാനൂറ്റി അൻപത് രൂപയല്ലേ ഞാൻ തരേണ്ടത്? തൊഴിൽ രഹിതനെന്ന നിലക്ക് ഭക്ഷണത്തിന്റെ പണമെനിക്ക് കമ്മറ്റി ഇളവ് ചെയ്ത് തരുമോ?".
ഇത്രയും പറഞ്ഞപ്പോൾ അലവി ഉസ്താദെന്നോട് പറഞ്ഞു.
"നിങ്ങൾ കമ്മിറ്റിക്കൊരു അപേക്ഷ കൊടുക്ക്.ഇളവ് ചെയ്ത് തരാൻ സാദ്ധ്യതയുണ്ട്".
ഞാനങ്ങിനെ കമ്മറ്റിക്കൊരു അപേക്ഷ കൊടുത്തു.ഒരുമാസത്തിനു ശേഷം വൈകുന്നേരം ഞാൻ ഓട്ടപ്പടവിലൂടെ പോകുമ്പോൾ മഹല്ല് സെക്രട്ടരി റഹീം ഹാജി സ്കൂട്ടി നിർത്താൻ വേണ്ടി കൈനീട്ടി.ഞാൻ സ്കൂട്ടി നിർത്തിയപ്പോൾ അയാളെനിക്ക് കവറിലിട്ട് ഒട്ടിച്ചൊരെഴുത്ത് തന്നു.ഞാൻ വീട്ടിൽ പോയി കവർ പൊട്ടിച്ച് അതിലുള്ള എഴുത്ത് നിവർത്തി വായാച്ചപ്പോൾ ഉള്ളടക്കമിങ്ങനെ.
"നിങ്ങൾ കമ്മിറ്റിക്ക് മുമ്പാകെ സമർപ്പിച്ച ഹരജി,കമ്മറ്റി യോഗത്തിൽ ചർച്ച ചെയ്ത് തീരുമാനമെടുത്തു.ഈ മഹല്ലിൽ കുടിയായി പരിഗണിക്കണമെങ്കിൽ വരിസംഖ്യയായി മാസത്തിൽ ഇരുന്നൂറ് രൂപയും, ഉസ്താദ് മാരുടെ ഭക്ഷണത്തിന്റ ചിലവിലേക്ക് രണ്ട് മാസത്തിലൊരിക്കൽ അഞ്ഞൂറ് രൂപയും തരൽ നിർബ്ബന്ധമാണ്.ആയതിനാൽ ഇവ രണ്ടിലൊന്ന് ഇളവ് ചെയ്ത് തരണമെന്ന് അപേക്ഷിച്ചതിനാൽ നിങ്ങളെ ഈ മഹല്ലിൽ കുടിയായി പരിഘണിക്കുന്നതല്ല".
ഇങ്ങനെ മഹല്ലിൽ നിന്ന് ഭ്രഷ്ട് കല്പിക്കാൻ ഞാനെന്ത് തെറ്റാണ് ചെയ്തത്?കമ്മറ്റിയിൽ നിന്ന് ഇളവനുവധിച്ച് കിട്ടാൻ ഞാൻ അപേക്ഷിച്ചതാണോ മഹല്ലിൽ നിന്നെന്നെ പുറത്താക്കാനുള്ള കാരണം? ഞാനെന്റെ പ്രാരാബ്ധം അവരെ ബോധിപ്പിച്ച് മഹല്ലിന് കൊടുക്കാനുള്ള സാമ്പത്തിക ബാധ്യതയിൽ ഇളവനുവദിച്ചു തരണമെന്നപേക്ഷിച്ചതിന്റെ പേരിലല്ലേ അവരെന്നെ മഹല്ലിൽ നിന്നുംപുറത്താക്കിയത്?.
അവരെന്തിനാണെന്നോടിങ്ങനെ ചെയ്തത്?.
മഹല്ലെന്നാൽ ഇസ്ലാമിന്റ പേരിലുള്ളൊരു കൂട്ടായ്മയാണ്.ഈ കൂട്ടായ്മയിൽ ഇസ്ലാമിന്റെ താല്പര്യങ്ങൾക്ക് നിരക്കാത്ത സമീപനം, വ്യക്തികളോടോ,പ്രശ്നങ്ങളോടോ സ്വീകരിക്കാൻ പാടുണ്ടോ?എനിക്കെതിരിൽ അച്ചടക്ക നടപടിയാണ് സ്വീകരിച്ചതെങ്കിൽ ഞാനെന്ത് അച്ചടക്ക ലങ്കനമാണ് നടത്തിയതെന്നവർ ഉന്നയിക്കട്ടെ.
നമ്മുടെ മഹല്ല് ഭരിക്കുന്നത്, നമ്മുടെയിടയിൽജനിച്ചുവളർന്നവരാണ്.അല്ലാതെ ഏതെങ്കിലും വിദേശക്തികളല്ല.അവർ മഹല്ല് നിവാസികളോട് ചെയ്യുന്ന ക്രൂരത ഒരു നിലക്കും മാപ്പർഹിക്കുന്നതുമല്ല.
നൂറ് വർഷക്കാലം ഇന്ത്യ ഭരിച്ച ബ്രിട്ടീഷുകാർ കച്ചവട താൽപര്യത്തോടെയാണിവിടം കടന്നുകൂടിയത്.അവർ നമ്മോട് ചെയ്ത ക്രൂരത സഹിക്കാവുന്നതിലപ്പുറമാണെങ്കിലും, അവരെ നാമിവിടെ ക്ഷണിച്ചു വരുത്തിയതോ, അവർ നമ്മുടെ ഗുണകാംഷികളോ ആയിരുന്നില്ല.
എന്നാൽ മഹല്ല് കമ്മിറ്റിയെ, മഹല്ല് നിവാസികൾ ഇസ്ലാമിക താല്പര്യത്തിന്റെ പേരിൽ തെരഞ്ഞെടുത്തവരാണ്.സമസ്തയുടെ മസ്ജിദുകളിൽ നിന്ന് നിത്യവും മഗ്റിബിന്റെ ശേഷമൊരു കാര്യം പ്രാർത്ഥിക്കാറുണ്ട്."അല്ലാഹുവേ ഞങ്ങളോട് കരുണയില്ലാത്തവർക്ക്,ഞങ്ങളുടെ മേൽ നീ ആധിപത്യം നൽകരുതേ".ഓട്ടപ്പടവ് മഹല്ല് ഭരിക്കുന്നത് വിദേശികളായ ബ്രിട്ടീഷുകാരല്ല,പ്രസ്തുത മഹല്ലിൽ ജനിച്ചുവളർന്ന ഇമ്മിണി വല്ല്യോരാണ്.അവരുടെ താല്പര്യം മഹല്ല് നിവാസികളുടെ ഗുണകാംക്ഷയായിരിക്കണം. എന്നിട്ടിവരെന്താണിങ്ങനെ കരുണയില്ലാത്തവരായത്?
ക്രൂരന്മാരായ മഹല്ല് കമ്മറ്റിക്കാർ ഒരു കാര്യം തിരിച്ചറിയണം.ഇപ്പോൾ കാലം മാറിയിരിക്കുന്നു.ആദ്യകാലങ്ങളിൽ ഒരുമഹല്ലിലെ നികാഹ് നടത്തണമെങ്കിൽ മഹല്ല് ഇടപെടണമായിരുന്നു.എന്നാൽ ഇന്നങ്ങിനെയല്ല.വരന്റെയും, വധുവിന്റെയും കുടുംബക്കാർ ഒത്തുകൂടി വധുവിന്റെ രക്ഷിതാവ് നികാഹ് ചെയ്ത് കൊടുത്ത് പഞ്ചായത്തിൽ റജിസ്റ്റർ ചെയ്താൽ മതി.ഇസ്ലാമിൽ സാധാരണ നിക്കാഹിന്ന് 'ഖാദി'യുടെ ആവശ്യവുമില്ല.
എനിയൊരാൾ മരിച്ചാൽ ഖബറടക്കാൻ മരിച്ച മഹല്ലിൽ താമസിച്ച ആളാണെങ്കിൽ ആ മഹല്ലിൽ തന്നെ ഖബറടക്കണമെന്ന് ഹൈക്കോടതിയുടെ വിധിയുമുണ്ട്.
ഒരു മഹല്ല് നിവാസി മഹല്ലിൽ അംഗമാകുന്നത് മാതാപിതാക്കളുടെ അനന്തരാവകാശമായിട്ടോ,മറ്റാരുടേയെങ്കിലും ഔദാര്യമായിട്ടോ അല്ല.പ്രായപൂർത്തിയാകുമ്പോൾ മഹല്ലിന് വരിസംഖ്യ നൽകിയും, താൻ അദ്ധ്വാനിച്ചുണ്ടാക്കിയ സമ്പത്ത് ദാനം ചെയ്തും,സംഭാവന ചെയ്തുകൊണ്ടുമാണ്.ഇങ്ങിനെയുള്ളൊരു വ്യക്തിയെ തലങ്ങും വിലങ്ങും ചിന്തിക്കാതെ മഹല്ലിൽ നിന്ന് പുറത്താക്കുകയെന്നാൽ പൈശാചികമാണ്.
Comments
Post a Comment